«Індеттік ауруалардың мониторингі» зертханасының бас ғылыми қызметкері, ветеринария ғылымдарының кандидаты, профессор Абеуов Хайрулла Бляловичті ветеринария саласына қосқан айрықша еңбегі үшін «Қазақстанның құрметті мал дәрігері» төсбелгісі марапатын иеленуімен құттықтаймыз.
Республикалық байқау мемлекет басшысы Қасым-Жомарт Кемелұлы Тоқаевтың «Әділетті мемлекет. Біртұтас ұлт. Берекелі қоғам» атты Қазақстан халқына Жолдауын ветериария саласының мамандары арасында кеңінен насихаттау мақсатында «Жаңа Қазақстан» Республикалық инновациялық қоғамының қолдауымен, «Bilim Orkenieti» ұлттық инновациялық ғылыми-зерттеу орталығымен ұйымдастырылып өткізілді.
Профессор Хайрулла Абеуов – ұзақ жылдар бойы ветеринария саласына зор үлесін қосып жүрген білікті ғалым. 2019 жылдан бастап қазіргі уақытқа дейін «Биологиялық қауіпсіздік проблемаларының ғылыми-зерттеу институты» ЖШС-де Институттың бас ғалым хатшысы, жаңадан құрылған Оқу ғылыми-білім беру орталығының бірінші директоры, жетекші және бас ғылыми қызметкер лауазымдық қызметттерін абыроймен атқарып келе жатыр.
Осыған дейін Қазақ ұлттық аграрлық университетінің ветеринария факультетінде болашақ ветеринария мамандарын – білімгерлерді тәрбиелеуде 12 жыл үздіксіз еңбек атқарған, оның алдында ҚР АШМ «Ветеринария бойынша ұлттық референттік орталық» ШЖҚ РМК Алматы филиалында зертхана меңгерушісіболған, ал, 1997 жылдан 2005 жылға дейін Қазақ ветеринария ғылыми-зерттеу институтында ғылыми жұмыстармен айналысқан. Ол Ақмола ауыл шаруашылық институтының ветеринария факультетін мал дәрігерлігі мамандығы бойынша аяқтап, ғылым жолындағы алғашқы қадамын Қазақ Ауыл шаруашылық ғылыми-зерттеу институтында (БҚПҒЗИ бұрынғы атауы) 1993-1997 жж. аралығында бастап, осы Институттың аспирантурасында сыртқы оқу бөлімінде білімін шыңдаған.
Профессор Х.Б. Абеуов 350-ден астам ғылыми-әдістемелік еңбектің авторы, ветеринария және биотехнология мамандықтары бойынша 8 ғылым магистрін дайындап шығарған, қазіргі уақытта ветеринариялық медицина мамандығы бойынша 1 PhD-докторанттың отандық ғылыми кеңесшісі.
Құрметті Хайрулла Біләлұлы, Сізге денсаулық, ғылыми-тәжірибелік қызметте шығармашылық табыс, ең батыл жобаларды іске асыруда, әрі үлкен мақсаттарға қол жеткізуде ізденімпаздық пен табандылық тілейміз!
Институт әкімшілігі