Алматы қаласының Ұлттық дәрілік заттар мен медициналық бұйымдарды сараптау орталығының (ҰДЗСО) аумақтық филиалының фармакологиялық сынау зертханасының базасында ҚР БҒМ ҒК Биологиялық қауіпсіздік проблемаларының ғылыми-зерттеу институты (БҚПҒЗИ) әзірлеген COVID-19-ға қарсы қазақстандық инактивтелген вакцинаның (QazCovid-in ®) клиникаға дейінгі зерттеулері аяқталды. Ведомствоның мәліметінше, аталған вакцина Қазақстан аумағында ауырған науқастардан бөлініп алынған вирус штаммының негізінде жасалған. Бұл туралы «ҚазАқпарат» ХАА мен Sputnik Қазақстан баспасөз орталығы өз сайттарында хабарлады.
«Вакцинаның, жануарлар ағзасына үлкен дозаларды енгізу кезінде қауіпсіздігі мен уытты әсері мұқият тексерілді. Сонымен қатар, осы зерттеу аясында енгізу орнында аллергиялық реакция мен тітіркендіргіш әсердің болмауы анықталды. Жалпы зерттеу әдістерінен басқа, вакцинаның қауіпсіздік деңгейі қанның гематологиялық және биохимиялық көрсеткіштерімен расталды. Сондай-ақ, вакцинаның жануарлардың ішкі органдарының жұмысына әсері бағаланды» – делінген таратылған хабарламада.
Клиникаға дейінгі зерттеу кезеңінің нәтижелері көрсеткендей, COVID-19-ға қарсы отандық вакцина улы емес және оны одан әрі клиникалық зерттеулерде ерікті адамдарға қолдануға болады.
Мекеменің баспасөз қызметі барлық эксперименттер ҰДЗСО өзіндік виварийлерінде тәжірибелік жануарлардың әртүрлі түрлеріне қойылғанын түсіндірді. Фармакологиялық зерттеулер зертханасы GLP OECD-ге сәйкестігі бойынша Словак Ұлттық Аккредиттеу Қызметінің (SNAS) халықаралық аккредиттеу мәртебесіне ие және биоэквиваленттілік зерттеулерін жүргізу бойынша Қазақстандағы жалғыз зертхана болып табылады.
Бұған дейін Дүниежүзілік денсаулық сақтау ұйымы (ДДСҰ) қазақстандық ғалымдардың әзірлемесін тіркеп, оны клиникаға дейінгі зерттеулерге рұқсат етілген COVID-19-ға қарсы кандидат вакциналар тізіміне енгізген болатын.
2020 жылғы 1 тамызында ДДСҰ сайтында COVID-19-ға қарсы БҚПҒЗИ-ының екінші қазақстандық суббірліктік вакцинасы кандидаттық вакцина ретінде сәтті тіркелгені белгілі болды.
2020 жылдың 26 шілдесінде вакцинаның 7 әзірлеушісі тірі вируспен жұмыс жасау кезінде өз қауіпсіздігін қамтамасыз ету үшін вакцинаны өз еркімен сынап көрді.
2020 жылдың қазан айының ортасында ДДСҰ талаптарына жауап беретін 200 еріктімен клиникалық сынақтардың II кезеңіне шығу жоспарлануда. Клиникалық сынақтардың II кезеңі 2020 жылдың желтоқсанында аяқталуы тиіс.
